La Zonte regjonâl e à dât la vie libare al bant pe realizazion di implants fotovoltaics e sistemis di cumul (batariis) intes unitâts residenziâls intestadis a personis fisichis residentis in Friûl-Vignesie Julie.
Cuntune delibare proponude dal governadôr Massimiliano Fedriga al à dât la vie libare al prin bant atuatîf de norme che e stanzie, intal so complès, 100 milions di euros par contribuî ae riduzion des spesis de energjie cjare a pro des fameis. Dopo chest prin at, a ‘ndi rivaran altris destinâts a altris dôs categoriis, o sedi pe instalazion di implants intai condomins e pes parochiis.
I incentîfs presints intal bant a son concedûts a font pierdût inte misure no superiôr al 40 par cent dal cost totâl dal intervent sostignût tacant dal prin di Novembar dal 2022. La domande e pues jessi presentade des personis fisichis residentis intal teritori regjonâl al moment de domande, che a risultin proprietariis dal imobil a ûs residenziâl che par chel e ven presentade domande di contribût. I intervents a àn di jessi fats a servizi di unitât che a àn categoriis catasticâls di A1 a A9 e A11. A son ametudis in particolâr lis spesis relativis al acuist e instalazion dai implants, i lavôrs corelâts, i sistemis pe gjestion energjetiche e il monitorament dal implant, lis spesis tecnichis, lis spesis di istrutorie e di gjestion de pratiche, lis cjamis di sigurece sostignûts pal intervent, cun Iva. (A.D.G.) – 10.02.2023
