Ustions gravis par un fantat di 13 agns a Taipane

Un fantat  di 13 agns al è restât ustionât in maniere serie intal dopomisdì di domenie ai 12 di Fevrâr, intant che si cjatave cun amîs intun cjamput di Montavierte, frazion dal Comun di Taipane.
Il zovin al è stât assistût dai sanitariis rivâts sul puest cun ambulance e elisocors e traspuartât in svol al Centro grandi ustionati dal ospedâl di Padue pes lesions che al à ripuartât inte part alte dal cuarp, di prin e secont grât.
Stant aes primis ricostruzions, cun altris amîs al veve impiât une fugarele doprant un bussul che al conten licuit inflamabil. Il contignidôr al à, però, cjapât fûc e un compagn, intal tentatîf di movilu, cuntune pidade lu à sburtât intor dal amì che al è stât cjapât de tornade di flame.
Sul puest ancje i Carabinîrs de Compagnie di Cividât e lis Vuardiis dal fûc. (A.D.G.) – 13.02.2023