Il Museu Civic di Art, la Biblioteche e dute la citât si inricjissin dal lassit dal professôr Andrea Romagnoli, docent di Matematiche e Fisiche al liceu Leopardis, muart intal 2021, concitadin gjenerôs che al à donât al Comun di Pordenon i siei libris e i siei cuadris, par un valôr preseabil intor dai 300 mil euros.
“La citât di Pordenon si inricjìs di un grant numar di oparis impuartantis – al sotlinee l’assessôr ae Culture Albert Parigi -, dimostrant che la culture, inte nestre citât, e je fate ancje di personis gjenerosis che le amin. In graciis di Romagnoli, di vuê Pordenon e je plui siore e nus permetarà di vierzi al public une stanzie dal Museu Ricchieri che prime no jere prontade. Pe esposizion des oparis o larìn daûr dal principi di rotazion, metint in mostre dut il lassit intal cors dal timp, e aplicant il stes metodi ancje ae Biblioteche che e esponarà i libris preziôs dal 1500 e dal 1600. Un ringraciament particolâr al va ai nestris funzionaris e colaboradôrs, che a àn lavorât par fâ sì che chest lassit al sedi incamarât e che a son daûr a catalogâ lis oparis, tignint in chest mût vîfs e atîfs i centris culturâi dal Comun”.
La gnove sale e sarà inmaneade tal plan superiôr di Palaç Ricchieri, sede dal Museu citadin di Art, e e presentarà une otantine di oparis ineditis de colezion Romagnoli, che a rimontin al Sietcent, Votcent e ai prins dal Nûfcent, fin cumò mai esponudis al public. (A.D.G.) – 13.02.2023
