Un ex dal Udin al anunzie: “O soi omosessuâl”

Une sielte cuintri curint che e à fat il zîr dal mont. Il centricjampist cec Jakub Jankto, che vuê al è tornât a zuiâ inte scuadre Sparta Praga, ma che al è stât puartât in Italie cuasi une desene di agns indaûr dal Udin, al à decidût di comunicâ a ducj la sô omosessualitât. Dopo vê fevelât in maniere vierte dal so orientament sessuâl cu la dirigjence, l’alenadôr e i compagns, al à fat chel che pôcs zuiadôrs fin cumò a àn olsât fâ: lu à anunziât in maniere publiche. Daurman al è rivât il supuart di tancj club innomenâts, di zuiadôrs e ancje di ex compagns tant che Bram Nuytinck, Antonin Barak, Alex Meret, Simon Scuffet, Bruno Fernandes… (A.I.) – 14.02.2023