Aes 10 di cheste matine lis Vuardiis dal fûc dal comant di Pordenon a son intervignudis a Davian, par un fûc dilunc de strade che e puarte al comprensori schiistic di Plan dal Cjaval.
Par frontâ il fûc, l’enesim dai ultins dîs, che de strade al jere daûr a lâ sù viers mont, i pompîrs a àn impegnât autopompe, autobote, un mieç fûrstrade cun modul pal antifûc boschîf e l’elicotar rivât dal Reparto Volo des Vuardiis dal fûc di Vignesie.
Par studâ il fugaron al è rivât sul puest ancje personâl dal Cuarp Forestâl regjonâl e i volontaris antifûc boschîf de Protezion civîl di Cjanive, Budoie e Davian. Presints, cun di plui, i Carabinîrs pes investigazions. L’intervent al è terminât a une dopo misdì, plui o mancul.
Dopo, a une e 40 dal dopo misdì, simpri al comant des Vuardiis dal fûc di Pordenon e je rivade une altre domande di intervent par un fûc de vegjetazion intal Comun di Polcenic. Inviade daurman sul puest la scuadre dal distacament di Manià che e à studât il fugaron; in maniere fortunade, ancje in graciis dal alertament svelt de scuadre, il fûc nol à fat masse dams.
Si vise che une segnalazion svelte dai fûcs e jude Vuardiis dal fûc, Cuarp Forestâl Regjonâl e operadôrs antifûc boschîf a studâ in timps svelts i fûcs limitant, par cetant pussibil, la devastazion di boscs e areis verdis. (A.D.G.) – 15.02.2023
