Il ‘Pojana’ al Visionario cuntun cine sul vencul nucleâr

Distopic, apocalitic, profetic. Dopo “Resina” e “Takeaway”, Renzo Carbonera al torne cun “Pluto”, cun protagonist un magjistrâl Andrea Pennacchi, innomenât pal so personaç, il Pojana, ospit setemanâl dal program Propaganda Live. Il regjist furlan al presente il so gnûf cine al public dal Visionario, miercus ai 22 aes 8 di sere. La storie e je chê di un om che al cjate un bon sotet tra lis monts, tal mieç dai rescj des variis vueris mondiâls combatudis intai ultins 100 agns. Scjampial di cualchidun o isal daûr a fâ une mission? Jentrant a piçui pas inte sô vite e intal so passât, si va jù intune spirâl di ricuarts, sugjestions, realtât e matetât, che al da sù la storie dal pericul atomic intai ultins 70 agns. (A.I.) – 21.02.2023