Mâldalsabida, une ricercje musicâl e poetiche al Palamostre

La stagjon teatrâl dal Teatri Stabil Furlan e va indevant joibe ai 23 di Fevrâr li dal Teatri Comunâl Palamostre di Udin cul conciert poetic Mâldalsabida, ricercje musicâl e poetiche che e partìs dal sun de lenghe furlane, struturade in trê cuadris sonôrs che a contin la poesie che e ven di lûcs decentrâts. Protagoniscj de serade a saran cinc artiscj furlans di talent: Aida Talliente, Leo Virgili, Giorgio Pacorig, Eugenio Dreas e Marco D’Orlando. Prime dal event, aes 5 inte Sale Carmelo Bene, un moment di aprofondiment intune taule taronde par creâ une discussion sui temis tratâts intal spetacul serâl. A intervignaran l’antropolic Gianpaolo Gri, il dramaturc Carlo Tolazzi, la scritore Giuliana Valentinis e la atore Aida Talliente. (A.I.) – 21.02.2023