La spiete e sta par finî. Domenie ai 26 di Fevrâr e torne l’Unesco Cities Marathon F-Vj, la maratone des citâts de Unesco. La ultime edizion si jere fate ai 31 di Març dal 2019, dopo e je rivade la pandemie e par trê agns no si è plui corût dilunc des stradis tra Cividât, Palme e Aquilee.
La Unesco Cities Marathon F-Vj e torne, pe edizion numar 8, cuntun percors gnûf, cun partence e rivade a Palme e passaç par Aquilee. Intant che Cividât, par chest an, e à ospitât la “vernîs” uficiâl dal avigniment, tignude lunis di matine in municipi.
La Unesco Cities Marathon F-Vj, ancje intal 2023, no sarà dome la gare su la distance regjine dai 42 chilometris. Su lis stradis de Storie, al sarà spazi ancje pe seconde edizion de Iulia Auguste Half Marathon, prove sui 21,097 chilometris de mieze maratone, pe Unesco in Rosa, la corse cun fins benefics dedicade aes feminis (part dal rigjâf al larà a poie des iniziativis de LILT), pal nordic walking e pe Speciâl Run, il passadôr dal Speciâl Olympics. (A.D.G.) – 21.02.2023
