Al è nassût uficialmentri il Centri di documentazion e promozion dal scoutisim citadin Memoria Viva. I avigniments, organizâts ai 15 e ai 16 di Otubar di doi agns indaûr, in ocasion dal setantesim cuint aniversari de prime promesse, a son stâts di fat une ocasion di no podê pierdi no dome par meti adun i scout di îr e di vuê, ma ancje une oportunitât par tirâ dongje testemoneancis, documents, fotografiis e materiâi varis, che part di chei e je stade ancje presentade ae citadinance intune mostre. Un patrimoni che si è pandût siôr e interessant in plui che impuartant dal pont di viste storic e sociâl, tant che apont si è ritignût di no dispierdilu ae conclusion des manifestazions. L’at costitutîf al è stât sotscrit inte sede di vie Seminario 7, al ultin plan parsore dai locâi de biblioteche dal Seminari teologjic, miercus ai 22 di Fevrâr. Une date simboliche, stant che e je la Zornade mondiâl dal Pinsîr: une zornade di amicizie internazionâl par dutis lis Vuidis e i Scout inte ricorence dal complean di Lord Baden-Powell, fondadôr dal moviment Scout, e di Olave Baden-Powell, la cjâf vuide mondiâl.
Inte cussience che la storie dai Scout a Gurize si instrece cun chê de citât stesse, il Centri di documentazion al intint duncje continuâ inte azion di racuelte di testemoneancis e di materiâl di divierse tipologjie e nature, catalogantlu par gjavâlu ae dismentie, ma ancje par fâlu fruibil e tornâlu in cualchi mût aes gjenerazions futuris.
Intai obietîfs dal sodalizi neonât grant rilêf al è risiervât ancje ae promozion dal scoutisim traviers la organizazion di avigniments, in sinergjie cul teritori, dreçâts ae sensibilizazion de citadinance a pet di une metodologjie educative restade di cumò e che ancjemò vuê al cjape milions di personis in dut il mont, tant di rapresentâ une ocasion impuartante di fradilance universâl. Intai progjets pal prossim futûr a son ancje iniziativis e colaborazions in viste di GO! 2025 intune otiche transfrontaliere.
I socis fondadôrs, in ordin di etât, a son: Antonio Ostroni, Giorgio Santoro, Maria Pia Colombo, Bernardo Spazzapan, Niko Klanjscek, Marina Blasi, Katja Klanjscek, Elisabetta Uria Mulloni, Luciana Gorini, Nicoletta Orzes, Salvatore Campo, Mauro Leban, Davorin Devetak, don Franco Gismano, Daniela Fain, Carlo Pola, Marco Gismano, Giovanna Portelli (presidente), Marco Zitter, Micaela Cobbe e Valentina Serrao.
Cui che al fos interessât a contatâ la associazion al pues scrivi un messaç di pueste eletroniche a portelli.gio@gmail.com. (A.D.G.) – 24.02.2023
