Intal moment dal bisugn e de emergjence, dapardut li che a capitin, la comunitât e lis aziendis furlanis no fasin mancjâ la lôr poie gjenerose, par slizerî lis soferencis causadis di disgraciis e calamitâts naturâls. Al è il concet esprimût cheste matine dal vicegovernadôr cun deleghe ae Protezion civîl dal Friûl-Vignesie Julie Riccardo Riccardi, che al jere presint ae consegne di 120 gjeneradôrs eletrics donâts de Danieli & C. Officine Meccaniche Spa, in partence domenie pe Turchie taramotade dal puart di Triest. La consegne e je stade fate inte sede de Protezion civîl regjonâl, a Palme, inte aree dai magazens. Al è di chi che, di cuant che, la setemane passade, il Friûl-Vignesie Julie al è stât identificât tant che centri nazionâl pe distribuzion e pe selezion dai aiûts umanitaris che a vegnin di dute la Italie e direts in Turchie midiant il puart di Triest, a van indenant lis operazions di ricezion di bens essenziâi, di selezion e duncje di spedizion cun vetôr fin al puart di Triest.
L’esponent de Zonte al à dit graciis ae societât Danieli pe sô donazion gjenerose di meti dongje a un container abitatîf za presint in puart, ancje chest donât de stesse dite e diret aes tieris fiscadis dal taramot. Fin a vuê a son doi i traghets partîts dal puart di Triest ae volte de Turchie, cul materiâl selezionât inte sede de Protezion civîl de Regjon a Palme. (A.D.G.) – 24.02.2023
