A son ducj positîfs i numars che CrediFriuli, che e met adun plui di 31 filiâls des Bancjis di Credit cooperatîf in regjon, e à iscrit intal belanç 2022, aprovât di pôc dal Consei di aministrazion. Ai 31 di Dicembar, lis massis aministradis in complès a àn tocjât i 3 miliarts di euros cuntune incressite dal 5 par cent a pet dal esercizi precedent, gjenerât dal aument sensibil de racuelte direte (plui 7 par cent), de stabilitât di chê indirete (plui 1,26 par cent) e dal plui 4,27 par cent segnât dai impleis. L’util net al rive a 21 milions di euros. Intal cors dal esercizi, la Bcc e à regjistrât la viertidure di plui di 2.700 gnûfs conts corints e la jentrade di plui di 350 gnûfs socis che a puartin il totâl a tocjâ cuote 11 mil (cuntune rivalutazion des cuotis sociâls previodude inte misure dal 8,1 par cent).
“I risultâts de gjestion a confermin, ancjemò une volte, la bontât dal nestri operâ e la sodisfazion pal lavôr otim realizât di ducj i nestris 180 colaboradôrs, che o ai graciât in maniere personâl, intune cul diretôr gjenerâl Gilberto Noacco, inte convenzion plenarie resinte si volte al Stadi Friûl – al aferme il president, Luciano Sartoretti – parcè che il capitâl uman al rapresente cence dubi il nestri plui grant valôr e invistiment”.
Intal cors dal 2022, a son stâts 16 i laureâts e laureants che si son svicinâts al mont dal lavôr in graciis di un percors formatîf struturât e studiât di pueste par lôr e 15 a son stâts i gnûfs colaboradôrs, che, a vari titul e rûl, a son stâts cjapâts a vore. Tra chescj ultins, ancje 9 zovins che a son stâts cjapâts al tiermin dal periodi di pratiche.
CrediFriuli, par testemoneâ la proprie vicinance ai clients, intun moment che la impenade dai tas e rapresente un pinsîr difondût, al è daûr a lâ lôr incuintri cun intervents personalizâts, par ricalibrâ lis ratis dai mutuis, par che si puedin sostignî a pet dal redit.
Lis beneficencis e lis sponsorizazions, intal cors dal 2022, a son stadis 429 par un totâl di 355 mil euros, testemoneance concrete di cetant che la Bcc e tegni a ricognossi il propri preziôs “dividint” al teritori che i à dispensât plui o mancul 2 milions di euros di contribûts intal ultin cuincueni. (A.D.G.) – 27.02.2023
