A saran 4 e no 5 i candidâts presidents che si sfidaran aes elezions regjonâls. Domenie ai 26 di Fevrâr, pôc prime di misdì, a son stadis consegnadis lis ultimis firmis. In dut 13 lis listis presentadis. La coalizion plui numerose e je chê dal centriçampe.
Massimiliano Fedriga pal centridiestre, Massimo Moretuzzo pal centriçampe, Alessandro Maran pal Terzo Polo e Giorgia Tripoli pal moviment che al met dongje no-vax, no-green pass e i miedis sospindûts.
A son chescj i nons dai 4 candidâts che o cjatarìn su lis schedis eletorâls aes elezions regjonâls ai 2 e ai 3 di Avrîl (cul eventuâl turni di balotazion previodut par domenie ai 16 di Avrîl).
La ultime candidature a jessi lade dentri dai uficis regjonâi di Udin e je stade propit chê dal president aspirant plui zovin, la candidade di 40 agns sostignude de liste ‘Liberi e Uguali’. La consegne des firmis a sô poie e je sucedude aes 11 e 58 minûts di matine, o sedi doi minûts prime de scjadince dal tiermin ultin.
Nuie di fâ, invezit, pal cuint candidât anunziât, Andrea Zhok. In vie Sabbadini no son rivadis lis firmis cjapadis sù di “Democrazia sovrana popolare” e chês dal “Movimento Friuli”.
Si scugnarà dut câs spietâ ai 3 di Març prime di vê la conferme definitive sui candidâts uficiâi, o sedi, cuant che a saran completadis lis verifichis su dutis lis sotscrizions presentadis a poie des 13 listis.
Dentri dai 6 di Març, in câs di depennamenti, i eventuâi escludûts a podaran presentâ ricors al Tar dal Fvj che al decidarà, par motîfs naturâi, in timps tant svelts. Pes elezions comunâls, invezit, al sarà ancjemò un pôc di timp. Lis candidaturis a podaran jessi deponudis dongje lis segretariis dai 24 comuns coinvolts fin aes 12 di martars ai 28 di Fevrâr. (A.D.G.) – 27.02.2023
