A Udin e tache la setemane dal design

Ancje ai 2 di Març di chest an, e par dôs setemanis in vie Mercatovecchio a Udin, si viodarà la grande scrite DESIGN, il segnâl di partence di “Udine Design Week 23”. Il Museu virtuâl dal Design dal Friûl-Vignesie Julie (Mu.De.Fri.) al torne ancjemò une volte coniugant culture, cumierç, artesanât, industrie e turisim. L’an passât la manifestazion e à vût grande visibilitât sul social media, rivant a passe 100 mil visualizazions dome su Instagram. La inaugurazion de rassegne, ae sô setime edizion cul teme che al zirarà ator dal concet di “Dimensione interspazio”, e je previodude par joibe ai 2, aes 11 di matine a palaç Morpurgo Valvason. Il percors espositîf al cjaparà dentri dute la citât, cun 6 mostris in galariis di art, 21 intes buteghis, 6 intes scuelis e un program plen di avigniments. (A.I.) – 28.02.2023