Un secul di bale tal zei inte nestre regjon

Nol è dome che un libri su la storie de bale tal zei in regjon, tant che racuelte plui o mancul organiche di dâts su campionâts, scuadris, zuiadôrs, tecnics e dirigjents. “Un secolo a canestro”, par cure di Flavio Pressacco, Roberto Ponticiello, Marino Firmani e Roberto Collini, al conte, daûr dal sottitul, “il Friûl-Vignesie Julie fra storie e sport”. O sedi, dut chel che la regjon e à dât – e al è pardabon tant! – ae bale tal zei taliane, tacant dai agns dal secont dopovuere. E, tal stes timp, e à contribuît a scrivi ciertis pagjinis impuartantis ancje dentri de storie de evoluzion economiche, sociâl, culturâl e gjeopolitiche de regjon. Il prin volum publicât di Aviani & Aviani Editori, che al va dal prin dopovuere ae fin dai agns Setante, al sarà presentât joibe ai 2, aes 5.30 dal dopomisdì inte sede di Confindustria di Udin. (A.I.) – 01.03.2023