Ancje il campionât sloven di curling al palaç de glace di Claut

Il palaç de glace di Claut al è deventât la sede di zûc ancje pal campionât dai nestris ‘vicins’. Dopo dal sucès des garis ospitadis in ocasion dal Festival Olimpic de Zoventût Europeane (Eyof), il palaçut al à fat il salt di cualitât. Il fin di setemane passât, ben siet scuadris de leghe slovene di curling a àn zuiât propit li dal palaç de glace “Alceo Della Valentina” un turni dal propri campionât, e altris 11 a rivaran de Slovenie vinars ai 17. Une oportunitât di disvilup ancje pes struturis ricetivis dal paisut dal alt cjanâl de Ciline. I dirigjents dal Curling Club Claut a son daûr a vê domandis di informazions di dute Italie. Cheste fin de setemane l’implant, di pôc ristruturât, al ospitarà ancje la finâl dal campionât ‘over 50’. (A.I.) – 09.03.2023