Cjapât sot un zovin intal centri di Triest

Un fantat di plui o mancul 26 agns al è stât socorût intal prin dopomisdì di vuê pes feridis vudis dopo di un incident stradâl a Triest, in vie Giosuè Carducci.

Par causis in cors di aciertament di bande des fuarcis dal ordin, il zovin al è stât tirât sot di un mieç intant che al cjaminave; restât cence sens a tiere al è stât socorût di passants che a àn clamât daurman il 112.

I infermîrs de Sores a àn inviât subit sul puest i ecuipaçs di une ambulance e di une machine di emergjence mediche. I sanitaris a àn stabilizât l’om che al è stât intubât e traspuartât in codiç ros al ospedâl di Cattinara. (A.D.G.) – 10.03.2023