Lella Costa e l’amôr dopo i 70 agns

Une sflandorose prove di atôrs par Lella Costa e Elia Schilton, miercus ai 15 li dal Teatri Gnûf “Giovanni da Udine”, protagoniscj di une storie delicade di intimitât, amicizie e amôr, pe regjie di Serena Sinigaglia. “Le nostre anime di notte” e conte la storie di doi vedui di passe setante agns e di une propueste imprevedibile, no erotiche, ma romantiche: il desideri di condividi ancjemò cun cualchidun la intimitât noturne. La storie e je gjavade dal romanç curt di Kent Haruf publicât intal 2015, un an dopo la muart dal scritôr american, za deventât un cine famôs cun Robert Redford e Jane Fonda. Il spetacul al larà po dopo, par une sole serade, intal Circuit dal Ert, joibe ai 16 al Auditorium Aldo Moro di Cordenons. (A.I.) – 14.03.2023