In chescj dîs Mozilla Firefox – il browser libar e multiplateforme di Mozilla Foundation – al à mandât fûr un gnûf inzornament (il numar 111) che al permetarà di sielzi, pe interface desktop e Android, ancje la lenghe furlane.
E je une operazion che e à viodût il siôr Fabio Tomat voltâ cuasi 14 mil stringhis. Un lavôr, il so, che al è il risultât di une dople, grande passion: chê pe informatiche e chê pes lenghis, anzit, par dîle miôr, pal furlan! Cuarante agns, machinist di trens, Tomat nol è gnûf a operazions di chest gjenar: «Al è dal 2010 che o fâs traduzions come cheste. E je une passion che e je nassude un pôc par volte e che e à podût dâ i siei risultâts ancje in graciis dai cors gratuits di furlan che o ai frecuentât intai agns e che mi àn permetût no dome di imparâ la gramatiche de lenghe, ma ancje di scuvierzi i tancj imprescj che si puedin doprâ pe traduzion. O scuen ameti che in principi o jeri carent, ma che po, midiant dal studi, de aplicazion e cu la passion, o pues dî di vê otignût risultâts une vore bogns», al à contât fevelant dal so percors di aprendiment de lenghe furlane.
Il so lavôr sul browser Firefox, che al ven di agns di impegn, si zonte a altris progjets impuartants peâts aes plateformis web e social, tant che la realizazion resinte de interface di Facebook par furlan, lis versions di WordPress e di Telegram in lenghe furlane, sostignûts de Regjon Friûl-Vignesie Julie e de Agjenzie regjonâl pe lenghe furlane – ARLeF. A son progjets in linie cui contignûts dal “Plan gjenerâl di politiche linguistiche pe lenghe furlane 2021-2025”, che al previôt, tra lis altris robis, la difusion dal furlan te esperience di ûs des plateformis tecnologjichis principâls. Al è propit par chest che de Agjenzie a son rivâts al siôr Tomat i compliments plui sintûts pal lavôr puartât insom e pe grande cualitât des traduzions fatis.
A chest pont, ai internautis che a doprin Mozilla Firefox no ur reste che discjamâ l’inzornament e sielzi il furlan! (A.D.G.) – 17.03.2023
294
