L’Inps al varà di paiâ plui di 400 mil euros di buine jessude a 41 ex agjents che a jerin intes fuarcis dal ordin che a àn lavorât in Friûl-Vignesie Julie. In medie ognidun di lôr al varà 10 mil euros. E je la consecuence des tantis sentencis publicadis îr dal Tar dal Friûl-Vignesie Julie, che al à acetât i ricors presentâts dai legâi dai 41 tra poliziots, financîrs, carabinîrs e vuardiis carcerariis.
I câs a rivuardin la esclusion di sîs scats intal calcul dal tratament di fin servizi par cui che al è lât in pension cun almancul 55 agns di etât e 35 agns di servizi. “L’Inps – al sclarìs l’avocat Enrico Antonio Cleopazzo di Manià, difensôr di plui di metât dai interessâts – al ritignive aplicabile une norme dal 1987 dome ai membris de polizie di stât e dome a cui che al veve fat domande dentri di un ciert tiermin. La esclusion no dovude – al conclût – e jere stade za tratade dal Consei di Stât e dai Tribunâi aministratîfs, che a vevin dât reson a altris che a vevin fat ricors”. (H.L.) – 17.03.2023
