La maratone musicâl traviers il mont e tache in Friûl

Ai 24 di Març, Zornade mondiâl pe lote cuintri la tubercolosi, al torne pe decime cuarte edizion “ToBe Continued”: un conciert unic che al dure 24 oris, di miezegnot ae miezegnot dal dì dopo. In chest timp, diviers musiciscj sparniçâts in varis ponts dal planet si colegaran su internet par mandâ la lôr musiche intun flus continui, cence nissune interuzion, a stafete, cuntun timp massim di 30 minûts par ognidun. A ideâ e coordenâ la operazion – un zîr dal mont simbolic in 48 tapis sonoris traviers 40 nazions e 5 continents – a son Antonio Della Marina, musicist espert di musiche di computer, e Moreno Miorelli, ideadôr de “Stazione di Topolò”. L’avigniment si scolte in rêt su stazioneditopolo.it. (A.I.) – 21.03.2023