E je ative di îr la aplicazion dedicade ae Adunade dai alpins, fate par condusi lis penis neris dilunc dai percors e tai lûcs di riunion dal avigniment in program a Udin dai 11 ai 14 di Mai. La app “Adunata alpini” e cjape dentri informazions buinis pai alpins che a sfilaran inte grande parade di domenie, partint de aree di ingrumament dongje di Plaçâl Osoppo.
La app e sarà inzornade dulinvie che si svicine l’avigniment cun mape detaiade e dutis lis informazions su la ospitalitât. Si podaran cognossi ancje i programs, dì par dì, partint di joibe ai 11 di Mai, cui apontaments uficiâi. Si jentre dopo intal specific de sfilade cul ordin di sfilament des rapresentancis e des sezions, ripartidis par setôr, orari di partence e intropaments. (A.S.) – 21.03.2023
