Cuatri scualificâts dopo la vitorie cul Milan

Dopo la polse pes Nazionâls, l’Udin al varà di fâ di mancul di trê zuiadôrs pe trasfierte di Bologne, ai 2 di Avrîl inte partide di misdì. La vitorie cuintri il Milan, ma soredut i cartelins dal arbitri Doveri, e je costade ben trê zuiadôrs scualificâts par un turni dal judiç sportîf: Rodrigo Becao, Nehuen Perez e Walace, za in difide e amonîts inte gare di sabide passade. Problemis par Sottil, che al varà di inventâ alc di gnûf, massime in difese, dulà che i oms aromai a son contâts. Ancje se il stes alenadôr nol podarà lâ in bancje parcè che il cartelin ros dopo lis protestis pal rigôr fat ripeti dal arbitri i è costât une zornade di stop e une multe par vê “contestât cun viamence une decision arbitrâl, berlant cun disposizion agressive”. (A.I.) – 22.03.2023