I socis dal Circul astrofii di Talmassons, dâts adun in assemblee, a àn confermât ae vuide de associazion il president di prime, Cristian Liberale di Basilian. La vice presidence e torne invezit a Talmassons, rimetude a un dai deans dal Cast, Virgino Savani.
Il segretari invezit al è gnûf, viodût che chest rûl al è stât dât a Federica Mattiussi di Udin, ative di mancul di un an, ma che e à dimostrât grande dedizion ae associazion. Confermât tesorîr Enrico Perissinotto di Premariâs. Dal Diretîf a fasaran part ancje Francesco Scarpa di Lignan, Fabrizio Romanello di udin e Paolo Beltrame di Passons. Lis publichis relazions a saran a cure di Stefano Codutti.
Par ce che al tocje il program dal 2023, di segnalâ che ai 6 di Mai e je previodude une serade impuartante cuntun conciert in onôr di Margherita Hack, che e je stade santule ae inaugurazion dal osservatori. Ae serade e parteciparà l’astrofisic Steno Ferluga, so colaboradôr al Osservatori di Triest. In Avost a tornaran ancje lis seradis aromai tradizionâls des Lagrimis di S. Laurinç, rivadis chest an ae 30me edizion. Pe Sierade tancj i progjets, cuntune serie di conferencis publichis. A son za stâts inviâts i contats cui astronoms Gabriel Vanin (espert di mitologjie des costelazions), Gabriele Cremonese (espert di cometis) e Enrico Stomeo (espert di meteoris). (A.D.G.) – 24.03.2023
