Teatri furlan: une cunvigne sui stâts gjenerâi ai 15 di Avrîl

Inte suaze de 46^te edizion de Fieste de Patrie dal Friûl, il Teatri Stabil Furlan e la Associazion Teatrâl Furlane a àn decidût di organizâ, pai 15 di Avrîl, te Sale civiche di Place Vittoria a Caprive, une cunvigne sui stâts gjenerâi dal teatri furlan: “Teatri furlan: il stât da la art”. Fin a cualchi deceni indaûr, si usave di fat confrontâsi in maniere corâl e costante tra dutis lis componentis dal teatri e il risultât al permeteve di formulâ strategjiis culturâls simpri plui impuartantis par une comunitât e une lenghe di minorance. Une pratiche utile e necessarie ma che ben planc e je vignude a sparî, scjafoiade (ancje) des proceduris e dai percors burocratics. Partint di chestis considerazions, a 35 agns de nassite de Associazion Teatrâl Furlane – ATF e a cuatri de fondazion dal Teatri Stabil Furlan – TSF, e je vignude sù fuarte la esigjence di tornâ un pas indaûr. Di tornâ a une pratiche dal incuintri e dal confront, simpri plui necessarie, vuê plui di îr.