I contribûts regjonâi par judâ gnûfs zovins a tacâ la profession di autist di camions e di autobus a son stâts acetâts in maniere positive di Confindustria Udine, che si augure che cumò la misure e deventi struturâl.
“Lis nestris impresis a àn une bisugne estreme e urgjente di gnûfs conducents – al à sclarît Massimo Masotti, cjâf grup Traspuarts e logjistiche di Confindustria Udine – e duncje o podìn dome che esprimi il nestri preseament pai contribûts che la Regjon e concêt, ancje pal 2023, pal otigniment de cjarte di cualificazion dal conducent e ancje des patentis C e superiôrs”.
“Il probleme de carence dal personâl viazant al è aromai a un nivel tâl di comprometi la operativitât des impresis di traspuart, no dome in Friûl-Vignesie Julie, ma plui in gjenerâl a nivel di Union europeane – al vise Masotti -. Di cheste situazion la nestre Regjon e je a cognossince di timp e an par an e viôt di concedi incentîfs pai conducents aspirants pe acuisizion dai titui professionâi ae vuide, che il so cost al è dificil di paiâ par cui che un lavôr ancjemò no lu à”. (A.D.G.) – 05.04.2023
