BancaTer Credito Cooperativo FVG e siere il 2022 cuntun util net di 9 milions di euros, ancje se a front di incjantonaments prudenziâi impuartants sui credits di 6,4 milions, che e puartin i fonts propris a plui di 178 milions di euros. Al cuint an di vite, numars ancjemò une volte in cressite pal istitût che si conferme in salût e al scuêt la fiducie dai clients (58 mil), cemût che al testemonee la incressite sul an di prime di 147 milions di euros di massis aministradis (+4,47%). Cjalant al ultin risultât di esercizi, ai 31 di Dicembar dal 2022, la racuelte complessive si è atestade a plui di 2 miliarts di euros, intant che i impleis a son pôc mancul di un miliart e 300 milions, indicadôr significatîf de fuarte poie ae economie reâl; la incidence dai credits deteriorâts sporcs e je lade jù al 4,35%, cuntune cuviertidure des soferencis dal 97,04%.
Risultâts une vore bogns che a saran sometûts ae Assemblee dai socis in program ae fin di Mai. Un passaç fondamentâl pal futûr de bancje, stant che i passe 11 mil socis a saran clamâts a esprimisi su la propueste di agregazion cun Friulovest Banca, dant vite -in câs di aprovazion- ae prime realtât dal Credit Cooperatîf di respîr regjonâl. (A.D.G.) – 05.04.2023
