Il Comun di Gurize intal 2023 al rinove i jutoris aes fameis in dificoltât par paiâ il fit. “Intai ultins agns la metât di chei che a fasin domande di aiût pai fits e je taliane, intant che fin a cualchi timp za fa la maiorance e jere foreste. A son fameis che a àn un redit medi, ma la tipologjie e je tant varie. Chest contribût al è une bocjade di ossigjen, duncje di bande nestre al è ben dâ une rispueste a plui domandis pussibilis”, al sotlinee l’assessôr comunâl al Welfare, Silvana Romano.
A son ametûts ai incentîfs i canui di fit dovûts e paiâts intal an 2022 par imobii destinâts ae prime cjase, di proprietât publiche e privade (escludûts chei di edilizie sovenzionade). Tra lis carateristichis, la residence a Gurize, il fat che il beneficiari al vedi di jessi resident in Friûl-Vignesie Julie di almancul doi agns continuatîfs e l’Isee dal nucli familiâr no superiôr ai 30 mil euros.
Pe prime volte la domande e à di jessi presentade doprant in maniere esclusive la modalitât telematiche cun autenticazion Spid, Cie, Cns dai 24 di Avrîl ai 9 di Jugn. Al è previodût un jutori intal inseriment de domande di bande dai CAF convenzionâts, dopo apontament. I uficis dal Servizi des Politichis sociâls a son a disposizion par informazions o sclariments ai numars 0481 383 523/513 e ae direzion di pueste eletroniche assistenza@comune.gorizia.it. (A.D.G.) – 05.04.2023
