A Cicunins, di 45 agns un Vinars sant ‘dal vîf’

La “Passione Vivente” di Cicunins si conferme un event vîf e ‘dal vîf’ che al travane la vite, lis ativitâts, il timp libar di dut un an dai volontaris che lu fasin. Rivade ae cuarantesime cuinte edizion, la sacre rapresentazion, chest an cul titul “Vox populi vox Dei”, e je ogni volte gnove e mai duplicade. Ogni edizion e je divierse des precedentis e gnove inte senegjature, inte trame, intes senografiis e intai costums. La Passion e ven contade di un pont di viste simpri gnûf dal 1979: i atôrs a son ducj a stâ a Cicunins, ma intai agns il cast si è inricjît di colaboradôrs dai paîs dongje. Personis di ogni etât e profession si metin al lavôr par un avigniment centrâl inte vite di une comunitât simpri plui slargjade, che vinars ai 7, des 9 di sere, al partirà tes viis dal paîs par rivâ su lis culinis de frazion di Feagne. (A.I.) – 06.04.2023