La storie dal pas-barcje e tache za intal 2017 cui incuintris tra imprenditôrs di Lignan e Bibion e cu la progjetazion dai professioniscj incargâts de societât Pinede. Su la spuinde venite la Aministrazion comunâl di S. Michêl al Tiliment e jere sot cu la costruzion dal imbarcjadôr di abordament sul flum Tiliment.
Intal 2018 cu la realizazion des rampis e scomence la aventure dal pas-barcje, buine za di traspuartâ pe prime stagjon ben 50 mil personis e ancjetantis bicicletis.
Intal 2019 cun plui servizis, il gnûf natant e cul coinvolziment des dôs Regjons Friûl-Vignesie Julie e Venit, il pas-barcje Lignan-Bibion al deventà di fin Lui un traspuart public locâl.
In graciis di une trate tant plui curte e ae incressite dal cicloturisim, i numars a àn continuât a lâ sù tocjant i 86.000 passizîrs.
Il nauli-riparazion des bicicletis, che al fâs ancje di bilietarie, al sarà gjestît chest an di Bike & Go di Carli Stefanel, che al proponarà ancje altris escursions e gjitis in biciclete; i distributôrs automatics di bevandis e mirindutis a saran simpri prerogative di Ilirie, intant che la societât Pinede e continuarà inte cure de aree verde traviersade dai cicloturiscj par rivâ al imbarcjadôr, inte pulizie des toilettes e inte racuelte diferenziade des scovacis, di là di furnî il servizi di wi-fi, iluminazion e di ricjarie des bicis eletrichis.
I oraris: ducj i fin de setemane di Avrîl des 9 aes 7 di sere in Avrîl, ducj i dîs di Mai, Jugn, Lui e Setembar simpri des 9 aes 7 di sere cuntune riduzion di orari serâl dome dai 11 di Setembar, par dopo tornâ a cjapâ i fin de setemane di Otubar e concludi cul prin di Novembar. Il presit dal biliet al è di un euro a persone, no pain invezit i fruts fin a 10 agns. (A.D,G.) – 13.04.2023
