A van indevant i lavôrs – ancje in cundizions meteo no favorevulis – par finî la tierce corsie intal toc tra Alvisopoli e Puart. Il slargjament des cjarezadis (fase 1 e 2 dal cantîr) al è a bon pont, al 90% par ce che al tocje la cjarezade Ovest (viers Vignesie) e al 60% viers Triest, dilunc dai nûf chilometris dal percors. Il cantîr, dut câs, nol previôt dome che l’ampliament de autostrade. Il progjet al consist ancje intal rifasiment e realizazion di dutis chês altris oparis. A son intervents che a àn di jessi fats par necessitât cence la presince di trafic parcè che a son luncs. Al è ce che al sucedarà tra sabide ai 15 e domenie ai 16 di Avrîl, cuant che – di là dai lavôrs sui tocs di gnove realizazion – al sarà distirât il gnûf asfalt sul Grop di Puart ae altece de rampe che de A4 (divignince Vignesie) al puarte ae A28 (direzion Conean). Chest al compuartarà diviersis limitazions ae circolazion.
In particolâr, des 8 di sere di sabide al sarà sierât il toc de A4 tra S. Stin di Livence a Tisane in dutis e dôs lis direzions. Dulinvie de matinade di domenie il toc autostradâl al tornarà a vierzi a pene che lis cundizions lu consintaran, ma – propit par vie dal intervent lunc e complès ae altece des rampis di Puart – al restarà inacessibil fin a misdì il svincul di jessude a Puart par cui che al rive di Vignesie e la jentrade a Puart in direzion Vignesie e Triest. Al sarà pussibil lâ fûr a Puart dome par cui che al ven di Triest. (A.D.G.) – 14.04.2023
