E scomence in chescj dîs la prime fase dai lavôrs pe ricualificazion de stazion di Gurize di bande de Rfi. L’invistiment al è di plui o mancul cinc milions di euros. Par consintî la operativitât dal cantîr, dai 20 di Avrîl ai 14 di Lui al vignarà blocât l’acès in stazion de jentrade di vie dal Cjars.
A son previodûts varis intervents al fabricât viazadôrs, ai listons dai binaris e al sotpàs. E sarà miorade la acessibilitât cu la eliminazion des barieris architetonichis che a esistin ancjemò e la jevade des banchinis a 55 centimetris (daûr dal standard european) par agjevolâ l’acès e la calade dai trens.
Doprade di plui o mancul 750 mil personis l’an, la stazion e je inte liste prioritarie di localitât che par chês RFI e previôt di potenziâ il rûl.
Si fasarà une revision complessive, implantistiche e struturâl cu la ridistribuzion razionâl dai spazis, ancje pensant a gnûfs servizis ufierts, l’ûs di materiâi di pueste, iluminazion e furniments, la estension des areis pedonâls e la cure des areis verdis. A saran inzornâts cun di plui i sistemis di informazion al public e miorât il servizi di assistence. (A.D.G.) – 18.04.2023
