Fats intai dîs passâts e fats savê vuê des Flamis Zalis i secuestris decidûts de Sezion Penâl Misuris di Prevenzion dal Tribunâl di Triest che a àn rivuardât dut il patrimoni mobiliâr e imobiliâr di un prejudicât.
Cinc autos di gruesse cilindrade, dîs orlois di lus, vilis cun pissine intes provinciis di Rome e Latine, conts corints (un di chescj in Austrie) par un valôr complessîf di 1,4 milions di euros a son stâts secuestrâts de Vuardie di Finance su la base dal “codiç Antimafie” a une persone ritignude “pericolose pal sociâl” e residente cumò a Netun.
A lui la magjistrature e atribuis une lungje serie di episodis di imbrois, ricetazion, ricicli e fraudis de Iva intal setôr des autoveturis di alte game che par chei, fra il 2020 e il 2021, al jere stât plui voltis arestât.
Des investigazions patrimoniâls, fatis dal Nucli di Polizie Economiche–Finanziarie su dut il nucli familiâr dal om, al è vignût fûr che il prejudicât al mantignive un alt tenôr di vite cundut di declarazions fiscâls tant bassis. Lis Flamis Zalis, in particolâr, a àn rilevât invistiments superiôrs a cuatri milions di euros intal arc dai vincj agns.
L’om acusât al varès fat la acuisizion di bens mobii e imobilis ancje midiant di societâts fatis a pueste che a fasin cjapitul ae femine e a cierts “prestenon”. (A.D.G.) – 21.04.2023
