I assessôrs di Fratelli d’Italia a restin ancje conseîrs

Cristina Amirante, Fabio Scoccimarro e Mario Anzil, al moment, a restaran intal lôr puest metût in Consei regjonâl. I trê assessôrs di Fratelli d’Italia, aprofitant de libare sielte lassade dal president Massimiliano Fedriga e dal segretari regjonâl dal partît Walter Rizzetto, a àn vût miôr mantignî il dopli rûl a diference dai coleghis de Lega Stefano Zannier e Barbara Zilli che a àn optât par lassâ il scagn di place Oberdan. Amirante, assessôr aes Infrastruturis, e sclarìs che “in chest moment nol è previodût che a sedin presentadis des dimissions. Dopo, in cors di opare, o fasarai des valutazions”. Posizion identiche par Anzil, vicepresident cun deleghe a Culture e Sport, che al veve confermât che al moment al restarà ancje in Consei. Scoccimarro, assessôr riconfermât al Ambient, al zonte che “il governadôr e il gno partît a vevin esprimût la volontât de mê riconferme in Zonte, ma o ai volût candidâmi pal Consei regjonâl metintmi al servizi di Fratelli d’Italia”. (A.D.G.) – 24.04.2022