Util di 33.733 euros intal 2022 pe Aziende pai servizis ae persone “La Quiete”. Lu certifiche il belanç aprovât dal consei di aministrazion.
“O vin sierât il belanç cul segn positîf – al à dit il president, Alberto Bertossi – cundut dal contest dificil dal an 2022, leât a diviers fatôrs: il condurâ dal stât di emergjence epidemiche di Covid-19, la criticitât ben cognossude conetude al andament dai coscj energjetics e al pês de inflazion, l’aument consecuent dai presits dai bens e dai coscj dai servizis. O volarès visâ che al è stât decidût di meti in bande, a titul dal dut prudenziâl, lis cjamis riferidis ai rinovaments prossims dai Ccnl dal personâl dipendent e a altris vôs par plui di 400 mil euros, chest al compuarte un risultât di belanç ancjemò miôr”.
Midiant ancje dal intervent regjonâl cu la contribuzion straordenarie assegnade su la base des minôrs jentradis in struture intal 2021 – e riferìs une note –, la aziende e à podût assorbî part de pierdite dal esercizi di prime.
La struture residenziâl e à vût une riprese progressive e impuartante des jentradis dai ospits a pet dal esercizi di prime cuntun tas di ocupazion di plui dal 11,52%. In plui, il prin trimestri 2023 al segne un altri trend positîf a pet dal trimestri dal an di prime cuntun plui 11,11%. (A.D.G.) – 02.05.2023
