Inadempiments in materie di sigurece sui lûcs di lavôr, mancjade formazion su la sigurece dai lavoradôrs, mancjât control sanitari e presince di lavoranzie in neri. E je dome cualchidune des violazions cjatadis dai carabinîrs dal Nucli Ispetorât Carabinîrs dal Lavôr di Udin che, in colaborazion cui coleghis de Compagnie di Udin, Palme e Tisane, a àn fat une schirie di controi su dut il teritori provinciâl.
A son stâts controlâts trê esercizis publics, une ativitât comerciâl, un cantîr edîl e une aziende intal setôr des manifaturis. Dopo des verifichis a son stadis sospindudis lis ativitâts di un cantîr edîl, di un esercizi public e di une ativitât comerciâl par violazions gravis su la sigurece e pe presince di lavoradôrs “in neri”. In complès a son stadis irogadis sanzions par plui di 80.000 euros. Par un bar a Cjampfuarmit, une pizarie a Maian, une buteghe di alimentârs a Manzan (in chescj ultins doi câs a jerin presints lavoradôrs in neri) e un cantîr edîl a Cjarlins e je stade disponude ancje la sospension de ativitât. (A.D.G.) – 08.05.2023
