Par festezâ i 45 agns di ativitât archeologjiche a Puçui, il grup di ricercjis storichis “Aghe di Poç” al à organizât la mostre “Puçui prime di Puçui”, che al conte lis scuviertis fatis intal teritori dal comun leadis al Neolitic e ae epoche dai Cjastelîrs. Dut al nas intal 1978 par câs: dilunc dai lavôrs par poiâ gnûfs tubis par l’acuedot, a vignirin ae lûs reperts archeologjics sedi dongje dal Cormôr, sedi parsore la culine dai Cjistiei. Di li a son tacâts sgjâfs di archeologjie puartâts indenant de Sorintendence e de Universitât, lâts indenant par cualchi desene di agns e che a àn puartât ae lûs insediaments umans, materiâi e ogjets de etât dal Bronç e dal Fier.
Intal 1981 cualchi persone di chenti, che e colaborave in maniere laboriose aes campagnis di sgjâf, e à decidût di fondâ une associazion che si interessàs di ricercjis storichis locâls: a jerin Marco Chiavon, Gianni Cogoi, Mauro Duca e Roberto Tosone.
Altris ricercjis e sgjâfs a àn, po dopo, confermât la presince di insediaments ancje dal periodi roman e medievâl. Altris a àn permetût di cjatâ e dopo sgjavâ, tacant dal 1985, une vile neolitiche dongje di Samardencje di proporzions une vore largjis e de durade di cualchi miâr di agns. La ultime campagne di sgjâf si è fate intal 2008.
La mostre si cjate inte Palacine di place Julia e si podarà visitâ intai fin de setemane fin ai 21 di Mai. (R.C.) – 9.05.2023
