In ospedâl a Udin al è muart Tiziano Venier, esponent di prin plan de Dc e ex president de Provincie de capitâl furlane. Al varès finît 80 agns a Setembar. Venier al jere a stâ a Grediscje di Sedean e al è stât president de Provincie di Udin dal 1985 al 1994.
Il president de Regjon, Massimiliano Fedriga, al à esprimût il so corot personâl e chel de Regjon. “Il so impegn politic, simpri impostât sui valôrs e sul afiet pal teritori – al à dit Fedriga – lu à puartât a vuidâ cun passion e previdence la Provincie di Udin par cuasi un deceni. Intai agns dopo, mostrant di savê cjalâ indenant, si è impegnât, a flanc di istituzions e categoriis economichis, par disvilupâ relazions avantazosis di colaborazion tra il Friûl-Vignesie Julie e i Paîs de aree balcaniche. Une figure politiche – al à concludût Fedriga – che e rapresente un esempli ancje pai nestris timps”. (A.D.G.) – 10.05.2023
