Al sarà Piero Petrucco il gnûf president de Federazion dai costrutôrs europeans (Fiec), associazion che e rapresente 3 milions di impresis che, cun 1.602 miliarts di faturât anuâl, e garantìs l’11,1% dal Pil dai 27 Paîs europeans.
Creade intal 1905, Fiec e rapresente – traviers lis sôs 31 Federazions nazionâls di 27 Paîs – lis impresis edîls di dutis lis dimensions, des Pmi ai conglomerâts globâi.
L’inzegnîr Petrucco al è stât designât in maniere formâl tant che president elet e al scomençarà il mandât tant che president cu la Assemblee gjenerâl dal 2024, sucedint al irlandês Philip Crampton, pal trieni 2024-2026.
Petrucco, elet intal comitât esecutîf di Fiec dal Dicembar dal 2019 cun deleghe ae sostignibilitât e ae competitivitât, al jere stât il prin furlan a rivâ ai organisims associatîfs europeans di categorie. Prime di lui, i ultins talians a cuvierzi la cjarie di president inte federazion dai costrutôrs europeans a jerin stâts Luisa Todini intal 2010 e Franco Nobili intal 2000.
L’aministradôr delegât de Icop di Basilian, za president de Consulte nazionâl des specializazions, al è cumò vicepresident di Ance nazionâl cun deleghe al centri studis e al PNRR e vicepresident vicjari di Confindustria Udine. (A.D.G.) – 15.05.2023
