A tornin a lâ sù i presits a Udin, cu la inflazion che in Avrîl, su base anuâl, e rive al +7,8% a pet dal 7,4% di Març. In Avrîl a cressin i presits ancje a pet dal mês precedent di Març, cuntun +0,3% che al segne une inversion di tindince. Di fat in Març, la variazion de inflazion e jere stade negative (-0,4% a pet dal mês precedent di Fevrâr).
In particolâr, intun mês a Udin a son cressûts i presits dai servizis ricetîfs e di ristorazion (+1%), i coscj de cjase, cu lis boletis di aghe, lûs e gas in prin plan (+0,9%), lis mobiliis, i articui e i servizis pe cjase (+0,7%), i traspuarts (+0,7%), il vistiari e lis cjalçaduris (+0,4%). A son calâts invezit i presits des comunicazions (-0,5%), chei di ricreazion, spetacui e culture (-0,4%) e chei di bevandis alcolichis e tabacs (-0,1%).
Intal ultin an, invezit, inte capitâl furlane al è un boom autentic pes boletis (+15,5%) e pai alimentârs e lis bevandis analcolichis (+11,7%). In cressite ancje servizis ricetîfs e di ristorazion (+8,2%), mobii, articui e servizis pe cjase (+7,5%), ricreazion, spetacui e culture (+5,5%), vistiari e cjalçaduris (+5,3%), traspuarts (+4,9%) e bevandis alcolichis e tabacs (+4,5%). (A.D.G.) – 16.05.2023
