Al è dut pront pe vincjesime edizion di Sapori Pro Loco, la grande manifestazion in program a Vile Manin dai 20 di Mai, che e permet di cerçâ lis tipicitâts enogastronomichis de Regjon. A son 25 chest an lis Pro Loco presintis e tancj avigniments culturâi intai doi fin de setemane.
Novitât di chest an l’anticip de inaugurazion uficiâl cu lis autoritâts ae sabide invezit che ae domenie: apontament ai 20 aes sîs sot sere sot des voltis de Barchessa di Ponente di Vile Manin. Prime dal moment de scree, aes cuatri e mieze dal dopomisdì, la firme de convenzion tra Unione Nazionale Pro Loco d’Italia e la Associazione Nazionale Città del Vino, di bande dai presidents nazionâi rispetîfs Antonino La Spina e Angelo Radica.
“Il fat che pe firme e sedi stade sielte Sapori Pro Loco – al comente il president dal Comitât regjonâl UNPLI dal Friûl-Vignesie Julie Valter Pezzarini – al testemonee ancjemò une volte di plui cetant che e sedi impuartante intal panorame no dome regjonâl, ma ancje nazionâl, la nestre manifestazion. Si conferme ancje la colaborazion laboriose fra lis Pro Loco de nestre regjon e lis Citâts dal Vin”.
“Sapori Pro Loco – al sotlinee Sergio Emidio Bini, assessôr regjonâl aes Ativitâts produtivis e Turisim – e taie il travuart dai 20 agns cu la edizion de riprese definitive, dopo il periodi de pandemie e des restrizions. In chescj agns lis Pro Loco regjonâls a àn ret il poc e a son stadis un presidi indispensabil pe socialitât dai nestris paîs, dant prove ancjemò une volte de impuartance dal volontariât, che al è un valôr ae fonde dal Friûl-Vignesie Julie”. (A.D.G.) – 16.05.2023
