Cividât e Udin a spietin la partide dal an

Il derby furlan di bale tal zei al va indenant. L’acès aes semifinâls par continuâ la corse viers la A1, tra Gesteco Cividale e Apu Udine, si decidarà ae ‘biele’, la partide di joibe al PalaCarnera di Udin aes 8 sot sere. Dopo vê vinçût la prime partide a Udin e vê pierdût chês altris dôs, no jerin alternativis pe Ueb Gesteco, che e à passât par 74-65 la Old Wild West intal palaçut di cjase, devant di un public in dutis lis gloriis. Se Cividât e je rivade al 2-2 cuntune partide perfete, la Apu e à paiât un prin timp orent, cun percentuâls disastrosis al tîr e ancje cualchi ingjenuitât. E cumò e rive gare-5: la partide dal an pe bale tal zei furlane. (A.I.) – 23.05.2023