Un pâr di cuars e un sghiribiç su la muse. La foto di Robet Miles che e je dedicade la aree zûcs ‘Children’ dentri dal parc Boschete Furlane a Cjampfuarmit, vuê a buinore e je stade cjatade sporcjade di vernîs rosse. Un at vandalic odeôs cuintri une zone furnide pal zûc dai fruts e ancje bande la memorie di un personaç tant amât, no dome in Friûl.
“Chest mot di inciviltât al pâr une frutaçade, ma al ferìs ducj – al comente il vicesindic Christian Romanini -. Il Comun al invide, cualsisei al puedi furnî cualchi informazion buine, a contatâ il 335 7782660. Il pont centrâl però, al è prevignî chestis azions che dopo a colin su la coletivitât, traviers percors di educazion civiche. Un esempli che o vin za metût in pratiche intes ‘Zornadis ecologjichis’, che a permetin di ‘tocjâ cun man’ ce che al vûl dî no vê cure dal ambient semenant ator refudons”.
La aree zûcs ‘Children’ e jere stade screade ai 19 di Novembar. Realizade in graciis de Fondazion Biasotti-Vuerich, e jere stade clamade come il toc plui famôs di Robert Miles (il feagnot Roberto Concina), un sucès mondiâl intal 1996, che lu veve componût in memorie des piçulis vitimis de vuere inte ex Jugoslavie. (V.V.) – 23.05.2023
