Pasolini e Cantarutti cu la vôs di doi atôrs di vuê

La vôs di doi grancj atôrs par ricreâ lis sugjestions dal dialic epistolâr fra Pasolini e Novella Cantarutti e une lûs di artist impiade sul denant di Cjase Colussi. Il centri studis Pasolini di Cjasarse al inmanee doi apontaments ancjemò dedicâts ae divulgazion e valorizazion de opare dal poete. Joibe ai 25, pe presentazion dal libri di Rienzo Pellegrini “Novella Cantarutti e Pier Paolo Pasolini: un dialogo asimmetrico”, a saran doi dai atôrs furlans plui preseâts, Massimo Somaglino e Aida Talliente, a dâ vôs al poete di Cjasarse e ae poetesse di Navarons. Vinars ai 26 invezit e sarà impiade la lûs di artist “Brusâ di amôr”, une instalazion luminose al neon te façade dal centri studis, che e riprodûs ben la scriture dal poete. (A.I.) – 24.05.2023