Il cont par ledrôs al è finît. I apassionâts di Tiziano Ferro lu puedin tornâ a sintî dal vîf, a ben cuatri agns dai siei ultins concierts. Miercus ai 7 il so gnûf tour intai stadis “TZN 2023” al tache dal “Teghil” di Lignan, dulà che al jere previodût in origjin za intal 2020. Rimandât une prime volte al 2021, po dopo cancelât dal dut, il conciert al è stât programât intal stes puest tant che “date zero”, prime des tapis di Turin, Milan e Rome: a sintîlu, almancul vinç mil personis. Il conciert di une des vôs plui preseadis de musiche taliane e je dome che une cerce di un Istât cetant siôr, in regjon: desenis e desenis di concierts, di Lignan a Tarvis, di Udin a Triest, di Grau a S. Denêl, cuntun numar di festival e avigniments mai cussì grant. (A.I.) – 06.06.2023
Foto di W. Azami
