La storie di Aquilee e batie la gnove arene di Spilimberc

Al torne CREAttivo, il progjet culturâl sul teritori che al met dongje ideazions artistichis, produzions artesanâls e industriâls, instreçant art, imprese, progjets e didatiche di alte formazion. Cul spetacul “I Mosaiciscj” dal Teatro Incerto, joibe ai 8 aes 7 sore sere li de Scuola mosaicisti del Friuli di Spilimberc, e tache la cuarte edizion. Spilimberc e je stade sielte par sotlineâ la atenzion de citât dal mosaic par un progjet multidissiplinâr, compagn di dutis lis produzions “Maravee” diretis di Sabrina Zannier. CREAttivo al scree, cun chest avigniment, la gnove arene di difûr: un lûc di spetacui dentri di un paisaç musîf. Il spetacul “I Mosaiciscj” al conte in mût divertent la storie dal Patriarcjât di Aquilee e lis origjins dal Cristianisim: cuatri secui di storie intune gnot, daûr dai studis di Pre Gilberto Pressacco e lis interpretazions di Renato Iacumin sui mosaics de Basiliche di Aquilee, trasformâts di Claudio Moretti, Fabiano Fantini e Elvio Scruzzi intun zûc pal public. (A.I.) – 07.06.2023