Il cjamp di svol AVRO di Riul di Osôf si fâs biel in viste de cuinte edizion di Air Expo, di chest an tornât a nomenâ in ‘Air Expo FVG’. E je stade asfaltade dal dut la strade di acès di Vie Rivoli, che e cor in bande de zone industriâl, e al è stât creât un ristorant – in timps record – a pôcs pas de Clubhouse.
Lis novitâts si podaran osservâ dal vîf di sabide ai 10 di Jugn e a pontin a svicinâ i apassionâts dal svol e, tal stes timp, a ufrî un gnûf servizi cuntune tape di ristôr pai aviatôrs in svol, che a podaran lassâ in fermade i lôr velivui intes aviorimessis dal cjamp di svol Avro. Si calcole che intai Paîs dongje, inte Europe Centrâl e intal Nord Europe, a sedin almancul 250 mil proprietaris di velivui di dipuart. “A son visitadôrs potenziâi de nestre realtât che a àn la pussibilitât di amirâle ancje dai cîi dal Friûl-Vignesie Julie”, al à sclarît il president de Fondazion ‘Lualdi’, Gabriele Lualdi. (A.D.G.) – 09.06.2023
