Un palaç in vie Ghiberti e un in vie Udine plui un magazen in vie Caccia. La Crôs rosse dal Friûl-Vignesie Julie e à metût in vendite cierts imobii a Triest cul obietîf di tornâ a invistî il rigjâf intal gnûf centri regjonâl cun spazi dedicât ae formazion che al nassarà inte Basse Furlane. Sul sît nazionâl de Cri, inte sezion Bandi, al è pussibil scjamâ i documents che a previodin par vie Ghiberti e vie Udine une manifestazion di interès no plui basse di 1,6 milions di euros, intant che par vie Caccia e je di 97 mil euros.
Ai 15 di Jugn, cun di plui, la Crôs rosse e celebrarà i 159 agns de fondazion cu la presince in tantis placis des citâts principâls de regjon e une manifestazion nazionâl al altâr de Patrie. Vuê l’ent al pues contâ su zovins volontaris, tant che un tierç di lôr al è sot dai 32 agns. (A.D.G.) – 14.06.2023