La fieste regjonâl dal schi e torne a Pontebe

Dopo cualchi an di assence, e torne la “Festa dello sci FVG”, l’avigniment che al siere la stagjon passade e al da il benvignût a chê sucessive, za partide il prin di Jugn. Apontament sabide ai 17 di Jugn aes 3 dopomisdì al palaç de glace di Pontebe, une des sedis di EYOF F-VJ 2023, il Festival Olimpic de Zoventût Europeane, tal Zenâr passât. La manifestazion e je promovude dal Comitât regjonâl de Federazion taliane sports invernâi, vuidât di Maurizio Dunnhofer, cu la colaborazion dal Comun di Pontebe, e e viodarà la premiazion dai circui di schi e dai prins trê classificâts di ogni categorie e dissipline praticadis inte nestre regjon. E sarà ancje la ocasion par ricuardâ i grancj risultâts otignûts a nivel internazionâl intai ultins mês dai atletis regjonâi, tacant dal titul mondiâl concuistât de sapadine Lisa Vittozzi. (A.I.) – 15.06.2023