Al vertiç tra lis ‘Città delle Spiagge’ che si è tignût îr a Milan al jere presint ancje Lignan cul sindic Laura Giorgi. Fuarts di une stagjon inviade cuntune incressite di presincis turistichis che e podarès puartâ il setôr balneâr a un dai agns record di simpri, i sindics dai Comuns G20 a àn inviât un confront sul percors iniziât par rivâ al ricognossiment dal status di “Città delle Spiagge”.
Ancje il sindic di Lignan, ae pari dai siei coleghis, si è dite convinte de rêt che e tire dongje lis localitâts plui grandis des splazis talianis – citâts che di bessolis a atrain cirche 70 milions di presincis turistichis, il 17% des presincis turistichis complessivis in Italie –, de dibisugne di completâ la normative che e permeti une miôr gjestion des localitâts, fasintlis plui competitivis e favorint, tal stes timp, une miôr difese ambientâl e un miorament soci-economic des comunitâts dai residents.
“L’incuintri – e à dite il sindic di Lignan – al è servît a testemoneâ lis dificoltâts che lis localitâts balneârs come la nestre, caraterizadis di un numar esigui di residents, ma cuntune pression turistiche fuartone, a vivin ogni dì. Il dialic cul Parlament al va indevant, ma nô o volìn tignî alte la atenzion a nivel nazionâl e duncje o vin acetât cun entusiasim la ocasion che nus è stade dade vuê, par continuâ a puartâ indenant la bataie pal otigniment dal status di ‘Città delle Spiagge’”. (A.D.G.) – 16.06.2023
