Cine in bici: si siere cu lis feriis dal 1950

Cinebike, il prin festival “bike-in” dal Friûl-Vignesie Julie, al è pront pal grant finâl cui ultins dîs di program a Grau, che a metin dongje il biel dal cine al viert cul plasê di lâ in biciclete ae scuvierte dal teritori. Il cûr dal festival al è te arene bike-in, la version ecologjiche su dôs ruedis dal model american dal “drive-in”, dentri dal Parco delle Rose, acessibil in biciclete. Vinars ai 23 al rive un grant classic che al fevele dai talians al mâr, “Domenica d’Agosto” dal 1950, cu la senegjature dal triestin Sergio Amidei. Invezit, sabide ai 24 si torne a fevelâ di crisi climatiche cun “Siccità” di Paolo Virzì, che al sarà presint par un salût in video. Il festival al cjape dentri ancje escursions ae scuvierte dal teritori, musiche cun Dj e la mostre “Vacanze al mare” cui manifescj dal cine talian dal 1949 al 1999. (A.I.) – 22.06.2023